Қазақ бар жерде қасиетті қара домбыра, домбыра бар жерде қазақтың күйі бар. Күй- қарға тамырлы қазақтың бағзыдан бойына сіңіп кеткен ұлттық өнері. Арқа күйшілік мектебінің ең көрнекті тұлғасы – Тәттімбет Қазанғапұлы еді. Жуырда Қарағандыда, дәулескер күйші Тәттімбет Қазанғапұлының 200 жылдығына арналған күйшілердің республикалық байқауы өткен еді. Шертпе күйдің шебері, күй өнерінің класcигі, тағлымды тұлғаның торқалы тойына арналған бұл байқауда үш күн бойы сынға түскен өнер майталмандары бар өнерлерін салды. Байқау барысында «Домбыра» номинациясында үздік деп танылған жерлесіміз, Тәттімбет атындағы өнер колледжінің 4-курс студенті Самал Мағауия 12 күй шертіп, бір пьеса ойнап, бас жүлдені жеңіп алды. Көне замандардан күні бүгінге дейін халқымызбен бірге жасасып келе жатқан киелі де қастерлі, сырлы да сұлу өнер үнін жүрегімен үндестірген жеңімпаз қызымыз Самал да аудандық өнер мектебінде күй өнерінің алғашқы сабақтарын ұстазы Сейсенбеков Марғұланнан алған еді.
