Дәртай Садуақасов

  Осы жылғы 29 маусымда Қазақстан Республикасының еңбек сіңірген мәдениет қайраткері, Ақтоғай ауданының Құрметті азаматы Дәртай Мұқатайұлы Садуақасов ұзаққа созылған ауыр науқастан қайтыс болды.

   Дәртай Мұқатайұлы 1937 жылы 22-қазанда Ақтоғай селосында туған. 1957 жылы өмірінің соңына дейін Ақтоғай аудандық мәдениет бөлімінде қызмет істеді. 1958 жылы Қарағанды 9 айлық баянистер курсын тәмамдап, бүкіл саналы ғұмырын халқына қызмет етуге, өнерге арнады. Ол жан дүниесімен халықтық өнерге берілген тума талант болатын. Ұзақ жылдар бойы аудан еңбеккерлерін әнмен әлдилеген, жерлестерін тамаша туындылармен сүйсіндірген, аудан өнерпаздарын республикалық, облыстық конкурстар мен байқауларға талай рет дайындап, жүлделі орындардан көрінуіне өлшеусіз еңбек сіңірген, елдің алғысына бөленген азамат еді.

  Ол құймақұлақ дарынды музыканттығына қоса, талантты композитор да болатын. "Жаса-жаса Шопан ата", "Екінші тыңның ерлері", "Мектеп бітірушілер вальсі", "Толқиды Тоқырауын толқындары", "Тентек қара", "Ән-Азамат", "Шашу", "Қазақстан-Үндістан", "Жеңіс тобы" әндері Ақтоғай өңірінде, одан тысқары жерлерде жиі айтылады. "Ақтоғай - алтын бесігім" әні оның шығармашылығының шыңы саналады. Бұл ән Ақтоғай ауданының әнұраны іспетті.

Дәртай Садуақасов 50 жылдан астам мәдениет саласында жемісті еңбек етті . Әсіресе "Тоқырауын толқыны" халықтық -этнографиялық ән-би ансамблін құрып, қалыптастыруға, оның қазақ өнерін Ресейге, Венгрияға, Үндістанға паш етуге сіңірген еңбегі орасан зор.

   Өнер жолындағы еңбегі бағаланып, "Құрмет белгісі" орденімен, "Еңбектегі ерлігі үшін" медалімен екі мәрте марапатталады. "Үздік мәдениет қызметкері" белгісіне екі рет ие болды. Оның жүздеген шәкірттері кең байтақ респубикамыздың түпкір - түпкірінде жемісті еңбек етіп жүр.

Ол - үлгілі ұстаз, тамаша тәрбиеші, отбасының ұлағатты басшысы еді. Тамаша азамат, өрелі өнерпаз Дәртай Мұқатайұлының жарқын бейнесі біздің жүрегімізде ұзақ сақталады.

                                                                                                                 Қарағанды облыстық мәдениет департаментінің облыстық мәдени

                                                                                                                 сауық және халық шығармашылығының ғылыми-әдістемелік орталығы.